Shkodra, në veri të Shqipërisë është një nga qytetet më të vjetra dhe më të pasura historike në vend. I vendosur pranë liqenit të Shkodrës dhe lumenjve Drin i Bardhë, Buna dhe Kir, dhe i rrethuar nga malet e veriut, qyteti ofron një kombinim të jashtëzakonshëm natyre, kulturë dhe histori. Peisazhet e saj të gjelbra, lumenjtë , liqenet e mëdha dhe malet krijojnë një ambient ideal për turizëm natyror, relaks dhe aktivitete sportive në natyrë.
Kalaja e Rozafës, një nga simbolet më të njohura të qytetit, qëndron mbi kodrën e saj dhe ofron pamje panoramike të liqenit dhe qytetit. Në Shkodër gjenden gjithashtu muze të ndryshëm, si Muzeu Historik, Muzeu Marubi i Fotografisë, xhamia e Plumbit dhe kisha të vjetra, të cilat tregojnë ndikimet e ndryshme historike dhe kulturore që kanë kaluar në këtë qytet. Lagjet e vjetra, rrugët me kalldrëm dhe shtëpitë tradicionale japin një shije të veçantë për vizitorët dhe ruajnë atmosferën autentike të qytetit.
Qyteti është gjithashtu një qendër e rëndësishme kulturore. Festivale artistike, panaire, koncertet muzikore dhe eventet tradicionale folklorike mbajnë gjallë jetën kulturore të qytetit pëgjatë gjithë vitit. Këngët shkodrane si dhe tavernat e shumta tradicionale me gatime lokale dhe pije shqiptare i japin qytetit një identitet të veçantë dhe një atmosferë të ngrohtë për vizitorët.
Rrethinat e Shkodrës ofrojnë bukuri natyrore dhe destinacione malore të mrekullueshme. Liqeni i Shkodrës, liqeni më i madh në Ballkan, ofron mundësi të shkëlqyera për sporte ujore, peshkim dhe shëtitje me varkë.
Shkodra është gjithashtu pika hyrëse për të zbuluar Alpet e Veriut, një nga zonat më të bukura dhe më të pasura natyrore të Shqipërisë. Vizita në fshatra si Thethi, Vermoshi, e të tjerë, ofrojnë mundësi të shumta për të njohur traditat lokale, mënyrën e jetesës alpine dhe aktiviteteve kulturore që ruajnë trashëgiminë e zonës.
