Muzeu Historik i Shkodrës është një nga institucionet më të vjetra të kujtesës kulturore në Shqipëri. Ai filloi të organizohej në vitin 1947 me emrin “Muzeu Popullor” dhe mori formën e tij të plotë në vitin 1949. Fillimisht i vendosur në një ndërtesë monumentale të shekullit XIX, në qendër të qytetit, muzeu u transferua në vitin 1996 në banesën monumentale “Shtëpia Oso Kuka”, ku ndodhet edhe sot.
Kjo shtëpi karakteristike shkodrane, me arkitekturë tradicionale dhe elemente autentike të ndërtimit, përfaqëson vetë një vlerë historike e etnografike. Në të janë vendosur disa seksione kryesore ekspozimi si: Arkeologjia, Etnografia, Arti Pamor (pikturë dhe skulpturë) dhe Biblioteka, që përbëjnë një udhëtim të plotë përmes historisë dhe kulturës së qytetit.
Ekspozitat e muzeut përfshijnë gjetje arkeologjike, veshje tradicionale, arma të vjetra, objekte artizanale dhe orendi të jetës së përditshme, të cilat pasqyrojnë zhvillimin historik dhe kulturor të Shkodrës ndër shekuj.
Sot, Muzeu Historik i Shkodrës, i vendosur në një prej godinave më të bukura tradicionale të qytetit, mbetet një qendër e rëndësishme e ruajtjes dhe promovimit të trashëgimisë kulturore, që dëshmon rolin e Shkodrës si një ndër qendrat më të vjetra dhe më të pasura në historinë shqiptare.
