Kulla Veneciane është një nga monumentet më të veçanta dhe më të bukura historike në Durrës. Ajo përbën një element të rëndësishëm të kalasë bizantine të qytetit, e cila është shpallur monument kulture i kategorisë së parë. Dikur, kjo kullë konsiderohej si një nga fortifikimet më të fuqishme përgjatë bregut të Detit Adriatik.
Fortifikimi që shohim sot, e ka fillesën te ndërtimet e para të perandorit bizantin Anastasi I (491–518), me origjinë nga qyteti i lashtë Dyrrhachium. Rreth shekullit XV, mbi themelet e kullës bizantine u ngrit Kulla Veneciane, e cila u pajis me topa për të mbrojtur qytetin nga sulmet detare. E projektuar posaçërisht për vendosjen e artilerisë, ajo shërbeu gjithashtu si pikë vëzhgimi për kontrollin e zonës përreth.
Gjatë viteve 2022–2023, Kulla Veneciane iu nënshtrua një procesi restaurimi dhe u shndërrua në Qendrën e parë Shqiptare të Interpretimit të Trashëgimisë. Sot, vizitorët mund të zbulojnë ngjarje historike përmes teknologjive të avancuara digjitale dhe multimediale, si kufje VR, audio-guida, projeksione në kupolë dhe aktivitete të tjera interaktive që ndërthurin argëtimin me një përvojë gjithëpërfshirëse mbi historinë e lashtë të Durrësit.
