Muzeu i Përgjimeve të Sigurimit të Shtetit, i njohur ndryshe si “Shtëpia me Gjethe” (House of Leaves), është një nga institucionet më veçantë muzeale në Shqipëri, i cili hedh dritë mbi mekanizmat e mbikëqyrjes dhe kontrollit gjatë regjimit komunist.
Ndodhet në qendër të Tiranës, përballë Kishës Ortodokse Autoqefale, dhe përbën një destinacion historik e reflektues për vizitorët vendas dhe të huaj.
Ndërtesa ka një histori të gjatë dhe shumëplanëshe:
- Në vitin 1931 u ndërtua si klinikë private;
- Gjatë Luftës së Dytë Botërore u përdor nga Gestapo;
- Pas luftës, në periudhën e regjimit komunist, shërbeu si seli e përgjimeve të Sigurimit të Shtetit, institucioni që mbikëqyrte dhe kontrollonte qytetarët.
Muzeu u hap për publikun më 23 maj 2017, dhe që prej asaj kohe ofron një përvojë të thellë emocionale përmes dokumenteve origjinale, pajisjeve të përgjimit, fotografive, dhe dëshmive të asaj kohe.
Ekspozitat janë të organizuara në disa pavione tematike që tregojnë mënyrën se si survejoheshin qytetarët, metodat e përdorura për përgjumje, si dhe ndikimin e frikës dhe izolimit në jetën e përditshme gjatë diktaturës.
Përveç ekspozitave të përhershme, muzeu organizon edhe ekspozita të përkohshme, veprimtari kulturore dhe aktivitete edukative, që nxisin reflektim dhe dialog mbi të kaluarën.
“Shtëpia me Gjethe” është sot një vend kujtese dhe ndërgjegjësimi historik, që ruan një pjesë të errët, por thelbësore të historisë së Shqipërisë së shekullit XX.
